Íslendingar gætu framleitt gjöreyðingarvopn

 ÞAÐ eru nú komin meira en 100 ár síðan Alfred Nobel fagnaði uppgötvun eiturgassins einlæglega með því fororði, að þetta vopn væri svo hræðilegt, að hann taldi það mundu binda enda á öll stríð. Enginn mundi þora að beita því. Þessi fróma ósk hins heimskunna   vopnaframleiðanda og friðarsinna rættist þó ekki. Eiturgasið reyndist gagnslítið í fyrra stríði og Hitler beitti því aldrei, þótt hann ætti miklar birgðir, enda vissi hann að andstæðingarnir mundu svara í sömu mynt. Ekki einu sinni kjarnorkusprengjan hefur bundið enda á styrjaldir, þær virðast mannkyninu áskapaðar.

Það er hins vegar ekkert leyndarmál, hvernig staðið er að gerð eiturgass og sýklavopna, þetta er afar einföld og ódýr framleiðsla, og hér á Íslandi, svo ekki sé farið lengra, er fjöldi efnafræðinga og lyfjafræðinga, sem gætu framleitt eiturgas ef þeir vildu, og fjöldi lífefnafræðinga, lækna og jafnvel meinatækna, sem gætu, ef þeir væru þannig innréttaðir í sálarlífinu, framleitt sýklavopn. Það er ekki langt síðan ungur Japani dreifði allra hættulegasta og eitraðasta taugasinu, Sarin, sem hann hafði framleitt úr skordýraeitri í bílskúr, á lestarstöð, og drap fjölda manns.

Öll tól og tæki, sem til þarf, eru tiltæk í landinu og efnin má kaupa í Lyfjaverslun ríkisins eða annars staðar, þar sem slíkt er selt. Víða má kaupa skordýraeitur, en því getur maður með lágmarks efnafræðiskunnáttu hæglega breytt í taugagas. Þarna er engin hátækni til staðar og öll þekkingin hefur legið fyrir í áratugi. Vanti menn upplýsingar um nánari atriði framleiðslunnar má fá þær á Netinu.

Allra auðveldast er þó að framleiða vinsælasta gas fyrri heimstyrjaldar, sinnepsgas. Hérlendis er mikið notað af klóri til fjölmargra hluta. Aðeins þarf að blanda þetta klór með hentugri sýru til að fá fínasta sinnepsgas, sem dugir til að drepa milljónir manna. Þessa framleiðslu má hefja með örstuttum fyrirvara. Raunar gerðist þetta óvart í sundlauginni á Reyðafirði fyrir nokkrum árum þegar klór blandaðist við edikssýru og miklu manntjóni var naumlega afstýrt.

Því er alls ekki hægt að útiloka þann möguleika, að uppreisnarmenn hafi staðið að baki árásunum í Sýrlandi. Á þá hefur mjög hallað upp á síðkastið, en Obama hafði lýst því yfir fyrir nokkru, að ef Assad beitti efnavopnum mundu Bandaríkjamenn skerast í leikinn gegn honum. Framleiðsla á og beiting á sarin er, sem fyrr sagði, afar auðveld úr algengu skordýraeitri og kann því að hafa verið aðferð þeirra til að fá stuðning Bandaríkjamanna.

Sumt af því, sem sagt hefur verið um þetta mál byggir augljóslega á þeim misskilningi, að enginn geti átt eða framleitt sarin nema stjórnvöld. Það er alrangt.

Athugasemdir

[Ásgrímur Hartmannsson, 9.9.2013 kl. 13:53]

Fjöldamorð eru auðveld. Hugsaðu þér að þú ætlaðir að myrða meira en 20 manns, skiftir þá engu hvern, þá ferðu bara og gerist kokkur einhversstaðar, og stelur úr næstu efnafræðistufu smá natríum-nítríti.

Instant dauði.

Öll vopn eru afar einföld.

Líf í friði er það sem virðist vera mjög erfitt, og reyna á heilabúið. Það er alltaf einhver *bjáni* sem þarf að vera með einhvern uppsteit.

[Ómar Ragnarsson, 9.9.2013 kl. 16:18]

Það, að sarin var beitt í Sýrlandi, sannar ekki eitt eða neitt. Þegar Saddam Hussein átti í vök að verjast gegn Írönum studdi Bandaríkjastjórn hann með ráðum og dáð og horfði í hina áttina þegar hann beitti efnavopnum gegn Írönum. Með því tókst að jafna leikinn svo að hvorugur sigraði og náði yfirráðum, sem ógnað gætu "jafnvæginu" í Miðausturlöndum, sem eru forsenda þess að viðhalda þeirri stöðu sem tryggur aðgangur að olíu gefur.  

Hugsanlegt er að ráðamenn í Bandaríkjunum spili svipað spil í Sýrlandi, - það sé þeim í hag að pattstaða ríki í borgarastyrjöldinni svo að enginn einn aðili hafi öll völd í landinu.  

[Davíð, 9.9.2013 kl. 17:07]

Ég las í sjálfshjálparbók handa hræddri þjóð að Alcoa hreyki sér af að framleiða hluti í eldflaugar sem notaðar eru í austurlöndum nær.

Ætli það sé ekki nóg.